Një takim i nivelit të lartë në Mal të Zi ka filluar të kërkojë mënyra për të ndaluar armët e paligjshme pasi një person i armatosur qëlloi dhe vrau 12 persona në tragjedinë e dytë të tillë në më pak se tre vjet në vendin e vogël ballkanik.
Bëhet e ditur se seanca urgjente e Këshillit të Sigurisë Kombëtare të Malit të Zi pritet të kërkojë një ligj të ri për armët dhe veprime urgjente për të konfiskuar ato që besohet se janë armë të paligjshme në zotërim të 620,000 qytetarëve të Malit të Zi.
Kombi i Detit Adriatik ka një kulturë të rrënjosur thellë të armëve.
Madje, televizioni shtetëror RTCG raportoi se Mali i Zi është i gjashti në botë për sa i përket numrit të armëve të paligjshme për frymë.
Personi i armatosur që vrau një duzinë njerëz në një sulm në qytetin perëndimor të Cetinjes të mërkurën e bëri këtë me një armë të paligjshme 9 mm.
Policia ka njoftuar se ka gjetur 37 gëzhoja në lokacionet e të shtënave dhe më shumë se 80 copa të tjera në posedim të personit të armatosur.
Ndërsa 45-vjeçari, i identifikuar si Aco Martinoviq, përfundimisht qëlloi veten në kokë dhe vdiq pak më pas.
Viktimat e Martinoviqit përfshinin shtatë burra, tre gra, mes tyre motra e tij, dhe dy fëmijë.
Katër persona të tjerë u plagosën rëndë dhe janë ende në spital, shkruan euronews, përcjell Telegrafi.
Komisioneri i policisë Lazar Shqepanoviç i përshkroi të shtënat si “një nga tragjeditë më të mëdha në historinë e Malit të Zi”.
Dhe ato kanë nxitur shqetësimet për nivelin e dhunës në shoqërinë malazeze, e cila është e ndarë politikisht.
Gjithashtu, kanë ngritur pyetje në lidhje me gatishmërinë e institucioneve shtetërore për të trajtuar problemet, duke përfshirë pronësinë e armëve.
Masakra në Cetinje, protestë para Qeverisë së Malit të Zi: Turp për ju, vrasës
Lexo po ashtu
Masakra në Cetinje, protestë para Qeverisë së Malit të Zi: Turp për ju, vrasës
Raportohet se qindra njerëz anembanë Malit të Zi ndezën qirinj mbrëmjen e së enjtes në kujtim të viktimave dhe kërkuan gjithashtu përgjigje se pse ndodhën të shtënat në radhë të parë.
Shumë ishin të zemëruar me autoritetet që nuk bënë më shumë për të parandaluar tragjedi të tilla.
Ndërkohë, rreth 200 njerëz protestuan jashtë selisë së qeverisë në Podgoricë të premten, duke kërkuar dorëheqjen e zyrtarëve të lartë të sigurisë dhe duke brohoritur “vrasës”.
“Nuk mund ta besoj se kemi dështuar kaq shumë si shoqëri. Dështuam edhe si njerëz”, tha Mira Shkoriq, pensioniste nga Podgorica.
Masakra e Cetinjes 2022
Ndryshe, në një masakër të veçantë në gusht 2022, një sulmues vrau 10 persona, duke përfshirë dy fëmijë, përpara se të qëllohej dhe vritej nga një kalimtar në Cetinje, i cili është kryeqyteti historik i Malit të Zi dhe ndodhet rreth 30 kilometra në veriperëndim të kryeqytetit, Podgoricë.
“Të shtënat kërkojnë një ekzaminim serioz të përgjegjësisë dhe gatishmërisë së sistemit të sigurisë”, thanë në një deklaratë grupet e Veprimit për të Drejtat e Njeriut dhe Qendra për të Drejtat e Grave.
Çfarë ka ndryshuar në sistemin e sigurisë në Cetinje që nga viti 2022?
Policia ka thënë se veprimet e Martinoviqit nuk ishin të planifikuara dhe ishin të pamundura për t’u parashikuar dhe parandaluar, megjithëse ai ishte dënuar në të kaluarën për sjellje të dhunshme dhe armëmbajtje pa leje dhe kishte marrë trajtim psikiatrik.
Vesna Pejoviq, një banore e Cetinjes që humbi vajzën dhe dy nipërit e saj në të shtënat e vitit 2022, tha se policia duhej të bënte më shumë për të mbrojtur qytetarët pas vrasjes së parë.
“Çfarë shteti dhe sistemi është ky ku vriten fëmijët? A jemi në luftë?” pyeti ajo. “Ku ishte policia?” /Telegrafi/