Janë mbyllur tashmë të gjitha ndeshjes sa i përket javës së 18-të në elitën e futbollit kosovar, aty ku pati disa përballje mjaft interesante.

Llapi për të tretën ndeshje radhazi nuk ka arritur që ta shijojë aromën e fitores pasi ka luajtur baras me rezultat 0-0 ndaj Dukagjinit në Podujevë.

Kjo ka bërë që llapjanët tashmë të pozicionohen në pozitën e nëntë në tabelë e cila të çon në Ligën e Parë.

Me barazim pa gola përfundoi edhe dueli mes Prishtinës dhe Malishevës që u zhvillua në kryeqytet, aty ku të dy skuadrat goditën nga një herë traversën, por duke mos arritur të marrin pikët e plota.

Pas triumfit në derbin lokal ndaj Dritës, Gjilani u mposht në udhëtim ndaj Ferizajt me rezultat 3-1, me këta të fundit që kanë bërë një hap të madh drejt largimit nga zona e barazhit.

Drita në anën tjetër u desh që të djersitej deri në sekondat e fundit për ta fituar përballjen ndaj Feronikelit ’74.

Të besuarit e Zekirija Ramadanit arritën që vetëm në minutën e 91-të ta sigurojnë fitoren, kjo falë golit të shënuar nga Arb Manaj.

Befasi nuk lejoi këtë javë as Ballkani të cilët arritën një fitore komode me rezultat 2-0 në derbin lokal ndaj Suharekës.

Drita vazhdon si lidere e tabelës me 40 pikë, shtatë më shumë se ndjekësi i saj Ballkani që ka 33 sosh.

Malisheva mban pozitën e tretë në tabelë me 30 pikë, teksa pas saj renditet Prishtina në të katërtën me 27 pikë dhe Suhareka që kompleton top pesëshen me 25 sosh.

Gjilani pozicionohet në vendin e gjashtë në tabelë me 21 pikë po aq sa ka edhe Dukagjini në pozitën e shtatë, teksa Ferizaj gjendet në pozitën e tetë me 18 pikë.

Dy ekipet e fundit në tabelë momentalisht janë Llapi me 18 pikë të tubuara deri më tani dhe Feronikeli me vetëm 10 sosh./Telegrafi/